ಖಾಸಗತ ನಿನನಾಮ ಏಸೊತ್ತ ನೆನೆಯಲಿ

ಲೇಸಾದ ಅರಿವು ನೀಡೆಮಗೆ

ಖಾಸಗತ ನಿನನಾಮ ಏಸೊತ್ತ ನೆನೆಯಲಿ

ಸಾಸವತ ನನ್ನ ನಾಲ್ಗ್ಯಾಗ | ನೆಲದೈತಿ

ವಿಸ್ವಾಸ್ದಿ ಕಾಯೊ ಅಭಿಮಾನ |

ಮನೆಯಾಗ ನೆಲಸೀದಿ ಮನದಾಗ ಸುಳಿತೀದಿ

ಗುಣದಾಗ ರೂಪ ತಾಳತೀದಿ | ಅನುಭಾವ್ದ

ಕಣದಾಗ  ರಾಶಿ ಮಾಡತೀದಿ |

ಹೆಸರಾಯ್ತು ಖಾಸಗತ ಉಸಿರಾಯ್ತು ಸಾಸವತ

ಖುಷಿಯಾಯ್ತು ಜಗವು ನಿನ್ನಿಂದ | ತಿಪ್ಪಲಕೆ

ಬಿಸಿಯಾದ ಮನ್ಸು ತಂಪಾಯ್ತು |

ಕೆಸರಾದ ಮನ್ಸು ತಿಳಿಯಾಯ್ತು |

ಹೆಚ್ಚೇನು ಹೇಳಲಿ ನೆಚ್ಚೀನಿ ನಿನಪಾದ

ಹುಚ್ಚನ್ನು ಬಿಡಿಸಿ ಕಾಪಾಡು | ಬದುಕಲ್ಲಿ

ಕೆಚ್ಚನ್ನು ತುಂಬಿ ಹೋರಾಡ್ಸು |

ಗುಟ್ಟೀನ ಮಾತಿದು ನೆಟ್ಟಗ ಹೇಳತೀನಿ

ಗಟ್ಯಾಗಿ ನೆಲಸು ಮನದಾಗ | ಖಾಸಗತ

ಪಟ್ಟಾಗಿ ಕಾಯ್ದು ಕರುಣಿಸೊ |

ಕಲ್ಲು ಕಲ್ಲಿನ ಮ್ಯಾಲ ಹುಲ್ಲು ಹುಲ್ಲಿನ ಮ್ಯಾಲ

ಚಲ್ಲುವರದೈತಿ ನಿನ್ನೆಸರು | ಹಬ್ಬುತ್ತ

ಸೊಲ್ಲಾಯ್ತು ಜಗದ ಒಡಲೊಳಗ |

ತಳಕೋಟಿ ಊರಿದು ಕಳಕೋತು ಕಪ್ಪಕಲೆ

ಬೆಳಕೋತ ಬಂತು ನಿನ್ನಿಂದ | ಖಾಸಗತ

ಬೆಳಕಾಯ್ತು ನಮ್ಮ ನಾಡಿಗೆ |

ಅನ್ನ ಕೊಟ್ಟವ ನೀನು ಚಿನ್ನಕೊಟ್ಟವ ನೀನು

ಬೆನ್ ಬಿದ್ದ ನನ್ನ ಕಾಪಾಡಿ | ಖಾಸಗತ

ಬಣ್ಣ ಕೊಟ್ಟೀದಿ ಮರಿಲೆಂಗೊ |

ಶಂಭುಹರ ನೀನೆಂದು ನಂಬಿಹುದು ನಾಡೆಲ್ಲ

ಸಾಂಬಶಿವನಾಗಿ ಕಾಪಾಡೊ | ಖಾಸಗತ

ಹುಂಬರ ಮ್ಯಾಳ ಮರಿಲಾರ್ದ |

ಆಟವ ಆಡ್ಸೀದಿ ಕೂಟವ ಕೂಡ್ಸೀದಿ

ನಾಟಕವಾಡಿ  ನಲಿಸೀದಿ | ಖಾಸಗತ

ಮಾಟದ ಬದುಕು ತೋರ್ಸೀದಿ |

ಬಕುತಿಯ ಬೆಳಸೀದಿ ಯುಕುತಿಯ ಕಲಿಸೀದಿ

ಬಕುತ ಮಾರ್ಕಂಡ ಆಟವ | ರಚಿಸೀದಿ

ಮುಕ್ತಿಯ ದಾರಿ ತೋರ್ಸೀದಿ |

ಜ್ಯೋತಿಯಲಿ ಖಾಸಗತ ಖ್ಯಾತಿಯಲಿ ಖಾಸಗತ

ಸೋತುಸೊರಗಿದ ಕಾಲಕ್ಕ | ಕೈಹಿಡದು

ಮಾತನ್ನುಳಿಸೀದಿ ಮಾದೇವ |

ಅಕ್ಕರದ ಮಾತಲ್ಲಿ ಸಕ್ಕರೆಯ ನಡೆಯಲ್ಲಿ

ನಕ್ಕವರ ನಗೆಯ ಬೆಳಕಲ್ಲಿ | ಖಾಸಗತ

ಹೊಕ್ಕಿರುವ ಬಗೆಯು ಬೆಡಗಾಯ್ತು |

ಮೊದಲೀಗೆ ಕೈಮುಗಿದು ತೊದಲೀನ ನುಡಿಗಳನು

ಹದಮಾಡಿ ಬಿತ್ತಿ ಬೆಳೆದಿರುವೆ | ನಾಲಿಗ್ಯಾಗ

ಸದರೀಲೆ ಕಾಯೊ ಖಾಸಗತ |

ಆಸತ್ರು ನೀನಿರುವೆ ಬ್ಯಾಸತ್ರು ನೀನಿರುವೆ

ತ್ರಾಸಿನಲಿ ಸಿಕ್ಕು  ನರಳ್ವಾಗ | ಖಾಸಗತ

ಲೇಸಾದ ಅರಿವು ನೀಡೆಮಗೆ |

ಚಣಹೊತ್ತು ನೆನದರ ಅಣುಮಾತ್ರ ಪಾಪಿಲ್ಲ

ಅನುದಿನ ನೆನೆದು ಪಾರಾಗೊ | ಸೂತರವ

ಮನದಾಗ ತುಂಬೊ ಖಾಸಗತ |

ಮುಂಜಾನೆ ನೆನೆದರ ಅಂಜಿಕೆ ಹರಿವೂದು

ಸಂಜೀಕ ಧ್ಯಾನ ಮಾಡಿದರ | ಬದುಕಿನ

ನಂಜೀನ ಪದರು ಹರಿವೂದು |

ಹೂವಿನ ಬಕುತಿಗೆ ನೋವೆಲ್ಲ ದೂರಾಯ್ತು

ಹಾವಿನ ನಂಜು ಬಯಲಾಯ್ತು | ಖಾಸಗತ

ಸಾವಿನ ನಂಟು ತಪ್ಪೊಯ್ತು |

ಅರಿಯುವ ತಿಳಿವನ್ನ ಮರೆಯುವ ಮಾತನ್ನ

ಪಿರುತಿಂದ ಉಣಿಸೊ ಅನುದಿನ | ಖಾಸಗತ

ಹರನಾಮ ಉಂಡು ಬೆಳೆವೇನೊ |

ಬೇವಿನ ಹಣ್ಣೀಗೂ ಮಾವಿನ ಪರಿಮಳ

ಹ್ಯಾವಿಗೆ ಬಿದ್ದು ನೆನೆದರ | ನಿನನಾಮ

ಸಾವಿಗೆ ಸದರ ಕಟತೈತಿ |

ಅರಿವಿನ ಖಾಸಗತ ಗುರುವಿನ ನೆನಿಬೇಕೊ

ಮರೆಯದ ಮಾತ ತಿಳಕೊರೊ | ಪದರಾಗ

ಬಿರಿಯಾಗಿ ಕಟ್ಟಿ ನಡಿಬೇಕೊ |

       *****

೨೪-೦೯-೨೦೧೩