ಆಟ - ಹುಡುಗಾಟ

ಆಟ - ಹುಡುಗಾಟ

ಆಡುವ ಆಟದಲಿ ಮಾಡುವ ಮಾಟದಲಿ

ನೋಡುವ ನೋಟದಲಿ ನೀನಿರುವೆ | ಖಾಸಗತ

ಕೂಡುವ ಉಸಿರಿನ ಯೋಗದಲಿ |

ಓದಿನ ತತ್ವವ ಬೋಧೆ ಮಹತ್ವವ

ಬೀದಿಲಾಡುವ ಆಟದಲಿ | ತೋರುತ

ಶೋಧವ ಮಾಡಿದೆ ಮನಸನ್ನು |

ಸಾಲಿಯ ಕಲಿಯುತ ಗೋಲಿಯ ಆಡುತ್ತ

ಸೋಲದೆ ಗುರಿಯ ಮುಟ್ಟುತ್ತ | ಖಾಸಗತ

ಲೀಲೆಯ ತೋರಿದ ಗೆಳೆಯರಿಗೆ |

ಆಡುತ್ತ ಆಟವನು ಹಾಡುತ್ತ ಗೀತವನು

ನೋಡುತ್ತ ಅನುಭವ ಪಡೆದಾನೊ | ಖಾಸಗತ

ಮಡುವ ಮಾಟದಲಿ ಕಾಡ್ಯಾನು |

ಹಾದಿಯಲಿ ನಡೆತಂದು ಬೀದಿಯಲಿ ಓಡಾಡಿ

ಮೇದಿನಿ ತುಂಬೆಲ್ಲ ಆಡಿದನೊ | ಖಾಸಗತ

ಸಾಧನೆ ಮಾಡುತ ನಲಿದಾನೋ |

ಹುಡುಗಾಟ ಮಾಡಮಾಡ್ತ ಬುಡುಬುಡಿಕೆ ವೇಷವನು

ತಡಮಾಡ್ದ ತೊಟ್ಟು ಬಂದಾನೊ| ಓಣೋಣಿ

ಆಡಾಡ್ತ ಮಾಟ ಮಾಡ್ಯಾನೊ |

ಹಾವುಗಳ ಹಿಡಿತಂದು ಹಾವುಗಾರನಾಗ್ಯಾನೊ

ಜೀವಜೀವ ಮಾಡಿ ಸಲುವ್ಯಾನೊ |ಖಾಗತ

ನೋವಾಗದಂತೆ ಆಡಿಸ್ಯಾನೊ |

ಒಡೆದು ಬೆಡಗಿನ ಕೀಲ ನಡೆದು ತೋರಿದ ಲೀಲ

ಪಡೆದುತಾ ಯೋಗದ ಅರಿವನ್ನು | ಖಾಸಗತ

ನಡೆದಾಡಿ ತೋರಿದ ಜಗಕೆಲ್ಲ |

ಯೋಗದ ಗತಿಯನ್ನು ಭೋಗದ ಮಿತಿಯನ್ನು

ತ್ಯಾಗದ ಎತ್ತರ ನಿಲುವನ್ನು | ತಿಳಿದಾನೊ

ಯೋಗಿಯೇ ತಾನಾದೊ ಖಾಸಗತ |

ಒಂದಿನ ಹಬ್ಬದಾಗ ಮಂದೆಲ್ಲ ಕರೆಯಲು

ಅಂದದ ವೇಷವ ಧರಿಸ್ಯಾನೊ | ಖಾಸಗತ

ಚಂದಾಗಿ ನಮಾಜು ಮಾಡ್ಯಾನೊ |

ರಟಗಲ್ಲ ಶ್ರೀಗುರು ಮಠಕೆ ತಾ ಬಂದಾಗ

ಅಟಮಟ ಅತ್ತಿತ್ತ ತಿರಗ್ಯಾನೊ | ಅವರಿಗೆ

ದಿಟವಾದ ಲಿಂಗಪೂಜೆ ತೋರ್‍ಯಾನೊ |

ಒಡನಾಡಿ ಖಾಸಗತಗೆ ಬಿಡದೆ ಸೇವೆಯ ಮಾಡಿ

ಹಿಡಿದ ಗುರುವಿನ ಹಾದಿಯ | ದೇವೇಂದ್ರ

ಪಡೆದ ಅನುಭಾವ ಅವನಿಂದ |

ಪರವೂರ ಮಠಗಳ ಸಿರಿಸಂಪದವನ್ನು

ವರನೀಡಿ ಬಂದಾನೊ ಅವರಿಗೆ  | ಖಾಸಗತ

ಶರಣರ ತತ್ವವ ಸಾರ್‍ಯಾನೊ |

ಗುರುಬಸವ ಲಿಂಗನ ಕರುಣೆಯ ಶರಣ

ಗುರು ಇಂಗಳೇಶ್ವರ ಸಿದ್ಧಲಿಂಗ | ಖಾಸಗತಗೆ

ವರವಾಗಿ ದೊರೆತದ್ದು ಘನಭಾಗ್ಯ |

ಮೊಗಲಾಯ ನಾಡಿನ ಮಿಗಿಲಾದ ನಿಜಾಮ

ಮಗನಿಲ್ದೆ ಗೋಳು ಪಡತಿದ್ದ | ಖಾಸಗತನೆ

ಒಗತನಕ ಸಂತಾನ ನೀಡೆಂದ | 

ಏಸೊತ್ತ ನೆನೆಯಲಿ...

ಏಸೊತ್ತ ನೆನೆಯಲಿ...

ಖಾಸಗತ ನಿನನಾಮ ಏಸೊತ್ತ ನೆನೆಯಲಿ

ಸಾಸವತ ನನ್ನ ನಾಲ್ಗ್ಯಾಗ | ನೆಲದೈತಿ

ವಿಸ್ವಾಸದಿ ಕಾಯೊ ಅಭಿಮಾನ |

ಶರಣು ಬಂದೆನು ನಿನಗೆ ಹರನ ರೂಪದ ಗುರುವೆ

ಮರಣವಿಲ್ಲದ ಗತಿಗೆ ಕರೆದೊಯ್ಯೊ | ಖಾಸಗತ

ಕರುಣೆಯ ತೊರೋ ಕಡೆತನಕ

ಗುರುವೆ ಖಾಸಗತ ನಿನಗೆ ಶರಣೆಂದು ಬಾಗಿರುವೆ

ಸೆರಗೊಡ್ಡಿ ಬೇಡುವೆ ಅನುದಿನ | ಖಾಸಗತ

ವರನೀಡಿ ನನ್ನ ಕಾಪಾಡೊ |

ಚಣಹೊತ್ತು ನೆನದರ ಅಣುಮಾತ್ರ ಪಾಪಿಲ್ಲ

ಅನುದಿನ ನೆನೆದು ಪಾರಾಗೊ | ಸೂತರವ

ಮನದಾಗ ತುಂಬೊ ಖಾಸಗತ |

ಸುರುವಿಗೆ ನಿನ್ನನಾಮ ಅರಿವಿಗೆ ನಿನ್ನನಾಮ

ಮರವಿಗೆ ಬಿದ್ದು ನಡೆವಾಗ | ಖಾಸಗತ

ವರವಾಯ್ತು ಜಗಕೆ ನಿನನಾಮ |

ಖಾಸಗತ ನಿನ್ನೆಸರು ಏಸೊತ್ತು ನೆನೆಯಲಿ

ತಾಸಿಗೊಮ್ಮೊಮ್ಮೆ ನೆನೆಯುವೆನೊ | ಖಾಸಗತ

ಹೇಸಿಗೆ ಬುದ್ಧಿ ಹೊರಹಾಕೊ |

ಮನೆಯಾಗ ನೆಲಸೀದಿ ಮನದಾಗ ಸುಳಿತೀದಿ

ಗುಣದಾಗ ರೂಪ ತಾಳತೀದಿ | ಅನುಭಾವ್ದ

ಕಣದಾಗ ರಾಶಿ ಮಾಡತೀದಿ |

ಹೆಸರಾಯ್ತು  ಖಾಸಗತ ಉಸಿರಾಯ್ತು ಸಾಸವತ

ಖುಷಿಯಾಯ್ತು ಜಗವು ನಿನ್ನಿಂದ | ಖಾಸಗತ

ಕೆಸರಾದ ಮನಸು ತಿಳಿಯಾಯ್ತು |

ಹೆಚ್ಚೇನು ಹೇಳಲಿ ನೆಚ್ಚೀನಿ ನಿನಪಾದ

ಹುಚ್ಚನ್ನು ಬಿಡಿಸಿ ಕಾಪಾಡು | ಖಾಸಗತ

ಕೆಚ್ಚನ್ನು ತುಂಬಿ ದಯಮಾಡೊ |

ಗುಟ್ಟೀನ ಮಾತಿದು ಗುಟ್ಟಾಗಿ ಹೇಳತೀನಿ

ಗಟ್ಟ್ಯಾಗಿ ನೆಲಸು ಮನದಾಗ | ಖಾಸಗತ

ಪಟ್ಟಾಗಿ ಕರುಣಿಸಿ ಕಾಪಾಡೊ |

ಕಲ್ಲು ಕಲ್ಲಿನ ಮ್ಯಾಲ ಹುಲ್ಲು ಗರಿಕೆಯ ಮ್ಯಾಲ

ಚಲ್ಲಾಡತೈತಿ ನಿನನಾಮ | ಖಾಸಗತ

ಸೊಲ್ಲು ಸೊಲ್ಲಿನಾಗ ಬೆರತೈತೊ |

ತಳಕೋಟಿ ಊರಿದು ಕಳಕೋತು ಕಳಂಕ

ಬೆಳಕ ಹಂಚಿತೊ ಜಗಕೆಲ್ಲ | ಖಾಸಗತ

ಹೊಳಪು ತಂದಿತೊ ನಾಡಿಗೆಲ್ಲ |

ಅನ್ನ ಕೊಟ್ಟವ ನೀನು ಚಿನ್ನ ಕೊಟ್ಟವ ನೀನು

ಬೆನ್ನ ಬಿದ್ದ ನನ್ನ ಕಾಪಾಡಿ | ಬದುಕಿಗೆ

ಬಣ್ಣಕೊಟ್ಟವನ  ಮರಿಲೆಂಗೊ |

ಶಂಭುಹರ ನೀನೆಂದು ನಂಬಿಹುದು ಜಗವೆಲ್ಲ

ಸಾಂಬಶಿವನಾಗಿ ಕಾಪಾಡೊ | ಖಾಸಗತ

ಹುಂಬರ ಮ್ಯಾಳ ಮರಿಲಾರದ |

ಅರಿಯುವ ತಿಳಿವನ್ನ ಮರೆಯುವ ಮಾತನ್ನ

ಪಿರುತಿಂದ ಉಣಿಸೊ ದಿನದಿನ | ಖಾಸಗತ

ಹರನಾಮ ಉಂಡು ಬೆಳೆವೇನೊ |

ಹಾಡಿನ ಒಡಲಾಗ ಮೂಡಿ ಬಯಲಾಗುತ

ಕೂಡಿಕೊಂಡಿರುವ ಬೆಡಗೇನು | ಖಾಸಗತ

ಜೋಡಾದ ಗುಟ್ಟು ಬಿಡಿಸೇಳು |

ಅರಿವಿನ ಖಾಸಗತ ಗುರುವಿನ ನೆನಿಬೇಕು

ಮರೆಯದ ಮಾತು ತಿಳಕೋರೊ | ಪದರಾಗ

ಬಿರಿಯಾಗಿ ಕಟ್ಟಿ ನಡಕೋರೊ |

ಮುತ್ತಿನ ಕಾಳುಗಳ ಬಿತ್ತುವೆ ನಾಲಿಗ್ಯಾಗ

ಉತ್ತುವೆ ಹದವಾದ ಕಾಲದಾಗ | ಖಾಸಗತ

ಒತ್ತರಿಸಿ ಬೆಳೆವಂತೆ ಕರುಣಿಸೊ |

ಕುಂಟಿ ಕೂರಿಗೆ ಸಾಲೊ ರಂಟಿ ರಾಗೋಲು ಮ್ಯಾಲೊ

ಬಂಟ ಬಸವನ ಹೆಗಲಮ್ಯಾಲೊ | ಕುಳಿತಿರುವ

ಬಂಟನು ನೀನೆ ಖಾಸಗತ |

ಕೂಲಿ ಕುಂಬಳಿ ಮಾಡಿ ಹಾಲು ಹಯನವ ಮಾಡಿ

ಕಾಲನ ಕಳವಳ ಗೆಲುವಂತೆ | ಖಾಸಗತ

ಲೋಲ ಶ್ರೀ ಗುರುವೆ ಕಾಪಾಡೊ |

ಅಂಗಳ ಹೊಡೆವಾಗ ಕಂಗಳು ತುಂಬ್ಯಾವು

ತಿಂಗಳ ಬೆಳಕು ಹೊಳೆದಾವು | ಖಾಸಗತ

ಲಿಂಗ ರೂಪವನು ನೆನೆದಾಗ |

ಕಮ್ಮಾರನ ತಿದಿಯಾಗ ಚಮ್ಮಾರನ ಡೊಣಿಯಾಗ

ಸೊಮ್ಮಿನ ಗುರುವೆ ನಿನಬಿಂಬ | ಖಾಸಗತ

ಸುಮ್ಮಾನದಿ ಕಾಯೊ ದುಡಿವವರ |

ಅಪ್ಪ ಖಾಸಗತ ಶಿವನೆ ತಪ್ಪಮನ್ನಿಸು ಪ್ರಭುವೆ

ಒಪ್ಪಿಸಿಕೊಳ್ಳೊ ಪಾದಕ್ಕ | ಶ್ರೀಗುರುವೆ

ತಪ್ಪದೆ ಬರುವೆ ನಿನ ಮಠಕೆ |

ಅಲ್ಲಿರುವೆ ಇಲ್ಲಿರುವೆ ಎಲ್ಲೆಲ್ಲು ನೀನಿರುವೆ

ಹುಲ್ಲಿನ ಚಿಗುರ ತುದಿಮ್ಯಾಗ | ಮುಲುಕಾಡಿ

ಕಲ್ಲೊಳಗು ಅಡಗಿ ಕುಳಿತಿವೆ  |

ಅಳ್ಳಿಯ ಮರದಾಗ ಕಳ್ಳಿಯ ಕಂಟ್ಯಾಗ

ಎಳ್ಳು ಹೂವಿನ ಎಸಳಾಗ | ಖಾಸಗತ

ಹೊಳ್ಳೊಳ್ಳಿ ನೋಡಿ ನಗತಾನೊ  |

ಚಂಡು ಹೂಹೂವಿನ ತೊಂಡತೊಂಡಲದಾಗ

ದುಂಡು ಮಲ್ಲಿಗೆ ಮುಗುಳಾಗ | ಹುದುಗಿದ

ಬಂಡನು ಉಣಿಸುವನೊ ಖಾಸಗತ

ಮುತ್ತೈದೆ ಮಗಳಾಗಿ ಮುತ್ತಿನಾರತಿ ಹಿಡಿದು

ಹೊತ್ತೇರು ಮುಂಚೆ ಬರುವೇನೊ | ಖಾಸಗತ

ತೊತ್ತಾಗಿಸಿಕೊಳ್ಳೊ ನನ ಮನಸ |

ರಟ್ಟಿಯು ಬಲಿಲಾರದ ನೆಟ್ಟಗೆ ಬೆಳಿಲಾರದ

ಹೊಟ್ಟಿ ತಿಪ್ಪಲಕ ದುಡಿವಂತ | ಮಕ್ಕಳನ

ಒಟ್ಟಾಗಿ ಸಲಹೊ ಖಾಸಗತ |

ಕೋಳಿಯ ಕೂಗನ್ನು ಕೇಳುತ ಮೇಲೆದ್ದು

ಏಳೇಳು ಬಾರಿ ನೆನೆಯುವೆನೊ | ಖಾಸಗತ

ಕಾಳಕತ್ತಲೆಯ ಹೊರದೂಡೊ |

ಖ್ಯಾತಿಯಲಿ ಖಾಸಗತ ಜ್ಯೋತಿಯಲಿ ಖಾಸಗತ

ಸೋತು  ಸೊರಗಿದ ಕಾಲಕ್ಕ | ಕೈಹಿಡಿದು

ಮಾತು ನಡೆಸೀದೊ ಮಾದೇವ |

ಅಕ್ಕರದ ಮಾತಿನ್ಯಾಗ ಸಕ್ಕರೆಯ ನುಡಿಯಾಗ

ನಕ್ಕವರನಗೆಯ ಬೆಳಕಾಗ | ಖಾಸಗತ

ಹೊಕ್ಕಾಡೊ ಬಗೆಯು ಬೆಡಗಾಯ್ತು |

ಆಸತ್ರೂ ನೀನಿರುವೆ ಬ್ಯಾಸತ್ರೂ ನೀನಿರುವೆ

ತ್ರಾಸಿನಲಿ ಸಿಕ್ಕು ಹೊರಳಾಗೊ | ಖಾಸಗತ

ಲೇಸಾದ ಅರಿವು ನೀಡ್ಯಾನೊ |

ಮುಂಜಾನೆ ನೆನೆದರ ಅಂಜಿಕೆ ಹರಿವೂದು

ಸಂಜೀಕೆ ಧ್ಯಾನ ಮಾಡಿದರ | ಬದುಕಿನ

ನಂಜೆಲ್ಲ ಕರಗಿ ಹೋಗುವುದೊ |

ಹೂವಿನ ಬಕುತಿಗೆ ನೋವೆಲ್ಲ ದೂರಾಯಿತೊ

ಹಾವಿನ ನಂಜು ಹರಿದೋಯಿತೊ | ಖಾಸಗತ

ಸಾವಿನಂಜಿಕೆ ದೂರಾಯಿತೊ |

ಬೇವಿನ ಹಣ್ಣೀಗೂ ಮಾವಿನ ಪರಿಮಳ

ದೇವ ನಿನ್ನೆಸರು ನೆನೆದರ | ಖಾಸಗತ

ಸಾವಿಗೆ ಸದರ ಕಟ್ಟತೈತೊ |

ತೊದಲ ನುಡಿ

ತೊದಲ ನುಡಿ

ಮೊದಲೀಗೆ ಕೈಮುಗಿದು ತೊದಲೀನ ನುಡಿಗಳನು

ಹದಮಾಡಿ ಬಿತ್ತಿ ಬೆಳೆದೇನೊ | ನಾಲಿಗ್ಯಾಗ

ಸದರೀಲೆ ಕಾಯೊ ಖಾಸಗತ |

ಹಸನಾದ ಹಾಡುಗಳು ಕಸರಿಲ್ಲದೆ ಮೂಡ್ಯಾವ 

ಕೆಸರಿಲ್ಲದ ಮನಸಿಂದ ಕೇಳಿರೊ | ಖಾಸಗತನ

ಹೆಸರಿಗೆ ದನಿಯ ಕೂಡಿಸಿರೊ |

ಹಾಡು ಹಾಡವರಿಲ್ಲ ಹಾಡು ಕೇಳವರಿಲ್ಲ

ಹಾಡೊಳು ಮುಳುಗಿ ನಿಂತವರಿಲ್ಲ| ಖಾಸಗತನೇ

ಹಾಡಿನ ಹಾಡು ತಿಳಕೋರೊ|

ಹಸನಾದ ಹಾಡಲ್ಲಿ ಹೊಸರಾಗ ಉಲಿತೈತಿ

ಕಸರಿಲ್ಲ ಒಂದೀಟು ಭಾವದಲಿ | ಖಾಸಗತನ

ಹೆಸರನ್ನ ಮತಮತ್ತ ನುಡಿತೈತಿ |

ಮುಚ್ಚಿಟ್ಟ ಭಾವಗಳು ಬಚ್ಚ ಬರಿ ಬಯಲಲ್ಲಿ

ಮೆಚ್ಚಿಗೆ ಹೂವಾಗಿ ಅರಳ್ಯಾವು | ಖಾಸಗತನ

ನಿಚ್ಚ ನಿಜರೂಪ ತಳೆದಾವು |

ನೂರಾರು ತ್ರಿಪದಿಗಳು ಸೂರಾಡ್ತ ಹೊರಬರಲು

ದಾರಿಯ ಕಾಯತಿದ್ವು ಭಾವದಲಿ | ಖಾಸಗತನ

ಸೂರಿಗೆ ತಾಳ ಹಾಕಿದವು |

ಸಾಲಚ್ಚಿ ಕುಣಿದಾಡ್ತ ಮೇಬಿದ್ದು ಜಿಗಿದಾಡ್ತ

ನಾಲಿಗೆ ಮ್ಯಾಲ ಮೂಡ್ಯಾವು | ಖಾಸಗತನ

ಲೀಲೆಯ ಮೆಚ್ಚಿ ಹಾಡ್ಯಾವು |

ಒಂದರ ಹಿಂದೊಂದು ಮುಂದಮುಂದ ಮತ್ತೊಂದು

ಬಂಧನ ಹರಿದು ನುಗ್ಗ್ಯಾವು | ಖಾಸಗತನ

ಚಂದದಿ ಹಾಡಿ ಹಿಗ್ಗ್ಯಾವು |

ಬಚ್ಚ ಬರಿ ಬಯಲಲ್ಲಿ ಹೊಚ್ಚ ಹೊಸ ಹಾಡುಟ್ಟಿ

ಹಚ್ಚ ಹಸುರಿನ ಚೈತನ್ಯ | ತುಂಬತೈತಿ

ಸ್ವಚ್ಛ ಮನಸಿಂದ ದನಿಗೂಡೊ |

ಬೇಲಿಯ ಹೂವಿನಾಗ ಕೋಲಿಯ ಬುಡಚ್ಯಾಗ

ನಾಲಿಗೆ ತುತ್ತ ತುದಿಮ್ಯಾಲಿನ | ಖಾಸಗತ

ಸಾಲು ಅಕ್ಷರದಿ ಮೂಡ್ಯಾಣ |

ಹುದುಗಿದ ಭಾವಗಳು ಪುದುಪುದು ಎದ್ದಬಂದು

ಹದವಾದ ಲಯದಲ್ಲಿ ಮೂಡ್ಯಾವು | ಖಾಸಗತನ

ಪದವಾಗಿ ಹಾಡಲ್ಲಿ ಅರಳ್ಯಾವು |

ಏಳೇಏಳು ದಿನದಲ್ಲಿ ತಾಳಲಾರದ ಚಿಗುರೊಡೆದು

ಕಾಳುತುಂಬಿ ತೆನೆಕಟ್ಟಿ ತೂಗ್ಯಾವು | ಖಾಸಗತನ

ಬಾಳಿನ ಚರಿತೆಂii ಹಾಡ್ಯಾವು |