ಉಸಿರಿನ ಉಸಿರು ಖಾಸ್ಗತ

ಉಸಿರಿನ ಉಸಿರು ಖಾಸ್ಗತ

ತಾಳಿಕೋಟಿ ನಾಡಿಗೆ ಬೆಳಕಾಗುವುದು

ಖಾಸ್ಗತನ ಹೆಸರನು ನೆನೆದಾಗ !

ಶಾಶ್ವತವಾಗಿ ನೆಲೆನಿಂತಿರುವ

ಆಬಾಲ ವೃದ್ಧರ ಮನದಾಗ !

ಜೀವದ ಜೀವ ಉಸಿರಿನ ಉಸಿರು

ಖಾಸ್ಗತನೆಂಬುದು ಅಭಿದಾನ !

ಮನೆ ಮನೆ ಮನೆಗೂ ಮನಸಿನ ಮೊನೆಗೂ

ಈತನ ನಾಮವೆ ಸುಯಿಧಾನ !

ದೇಶವ ತಿರುಗಿ ಕೇಶವನೋದಿ

ಏರಿದ ಅರಿವಿನ ಎತ್ತರಕೆ !

ಪುರಾನ ಪ್ರವಚನ ಅನುಭವ ಸಿಂಚನ

ಜಡಜೀವನದ ಚೇತನಕೆ !

                             

ಆಟ ಹುಡುಗಾಟ ನಾಟಕವನಾಡುತ

ರಂಜನೆ ನೀಡಿದ ಜನಮನಕೆ !

ಆಡುತ ಹಾಡುತ ಬೀದಿಯ ಅಲೆದು

ತತ್ವವ ಸಾರಿದ ಲೋಕಕ್ಕೆ !

ಹಸುಗೂಸಾಗಿ ಬೇಡಿದ ಕಾಡಿದ

ಸಜ್ಜನ ಬಸಮ್ಮ ತಾಯೀಗೆ !

ದೀಕ್ಷೆಯ ನೀಡಿ ದಾರಿಯ ತೋರಿದ

ಪಡೇಕನೂರಿನ ಭಕ್ತನಿಗೆ !

ಭಿಕ್ಷಪ್ಪಯ್ಯನ ಗದ್ದುಗೆಯಲಿ

ಮಾಡಿದನು ದಿನ ಶಿವಧ್ಯಾನ !

ನಮಾಜು ಮಾಡಿ ಆಚ್ಚರಿಗೊಳಿಸಿದ

ಪ್ರೀತಿಯ ಮುಸ್ಲಿಂ ಬಂಧುಗಳನ !

ಸಿದ್ಧಾರೂಢರ ಒಡನಾಡಿಯಾಗಿ

ಲೋಕೋತ್ತರ ನಡೆ ನಡದಾನ !

ರಟಗಲ್ಲ ಶ್ರೀಗಳ ಮೆಚ್ಚುಗೆ ಗಳಿಸುತ

ಲಿಂಗಪೂಜೆಯ ಮಾಡ್ಯಾನ !

ಶಾಖಾ ಮಾಠಗಳ ಸಿರಿಸಂಪದವನು

ಆ ಊರವರಿಗೆ ಒಪ್ಪಿಸ್ಯಾನ !

ಬರಗಾಲದಲ್ಲಿ ದಾಸೋಹ ನಡೆಸಿ

ಬಡವರ ಸೇವೆಯ ಗೈದಾನ !

ಮೂರೇ ದಿನದ ಸಂತೆಯ ಬದುಕಿಗೆ

ಸಾರ್ಥಕ ರೂಪವ ನೀಡ್ಯಾನ !

ಮೂವತ್ಮೂರೇ ವರ್ಷಗಳಲ್ಲಿ

ಅದ್ಭುತ ಸಾಧನೆ ತೋರ್‍ಯಾನ !

೦೫.೦೯.೨೦೧೨